Nyheter
Oppdatering av smitteverntiltak ved Mo skule
Det har no kome ei oppdatering av smitteverntiltak for skular som skal gjelda frå 02.06.20. Skular skal no organisera tiltak etter ein trafikklysmodell. Frå andre juni gjeld tiltak på gult nivå. Mo skule held fram med å fylgja dei råd og tiltak som til ei kvar tid gjeld. Tiltaka på gult nivå er om lag dei same som dei ein har arbeidd etter fram til no for Mo skule sin del. Oppdatering
Barnehage og skule i Modalen opnar 11.mai
Frå veke 20, måndag 11.mai vil barnehagen vere open frå kl 8.00- 16.00
Om det er andre behov for andre opningstider så ta kontakt med Grete Urdal på tlf, 56599060 eller e-post, grete.urdal@modalen.kommune.no.
Mo skule opnar for alle elevar måndag 11.mai
Frå 11.mai er Mo skule klar til å gje alle elevane ordinær undervisning på skulen. Alle elevar møter til vanleg tid. Skulebussane går som normalt, og SFO føl ordinære opningstider. Mo skule føl gjeldande smittevernrettleiar i alt arbeid i tida framover.
Vel møtt!
Utkast til Rusmiddelpolitisk handlingsplan 2020-2024
Rusmiddelpolitisk handlingsplan vart handsama i formannskapet 28.04.20 med følgjande vedtak:
Modalen kommune legg utkast til Rusmiddelpolitisk handlingsplan 2020 – 2024 ut på høring med frist for innspel eller merknadar satt til 22. mai 2020. Planutkastet skal deretter til handsaming i kommunestyret.
Rusmiddelpolitisk handlingsplan
Delvis opning ved Mo skule
Mo skule startar opp undervisning for 1.-4.klasse og ordinær SFO frå 27.04.20. Skulen føl rettleiar frå Udir/FHI i samband med oppstart. Denne finn du her: https://www.udir.no/kvalitet-og-kompetanse/sikkerhet-og-beredskap/informasjon-om-koronaviruset/smittevernveileder/skoletrinn-1-7/
Det er trygt for elevane å koma attende på skulen no dersom ein føl dei retningslinene som gjeld.
Det er sendt heim utfyllande skriv til alle heimar som e-post.
Skulebussane køyrer til vanlege tider og elevane møter etter vanleg timeplan.
Me ser fram til å få elevar attende på skulen!
Rektor
Utlån av bøker
Sjølv om alle biblioteka i Noreg no er stengt har ein mange stader i landet lagt til rette for at ein kan halde fram med å låne bøker.
I Modalen samarbeider biblioteket med Roger Fure på Coop om eit «takeaway»-opplegg:
1) Lånarane bestiller bøker frå biblioteket (SMS: 409 20 271 /
e-post: erik.vollmer@modalen.kommune.no)
2) Bibliotekaren sender hentemelding til lånaren når bestillinga er ekspedert
3) Lånaren hentar materialet på Coop.
Me tar sjølvsagt omsyn til smittevern når me plukkar bøker, med god handhygiene og bruk av plasthanskar.
Du treng ikkje å levere tilbake bøkene før vi opnar att. Du vert ikkje purra for bøker du har heime.
Skulle du likevel ynskje å levere inn bøker vil me helst ha dei inn på Bryggjeslottet eller på kommunehuset 1.etg.
Alle bøker som kjem inn får tre dagar i «karantene» hos oss, deretter vert plastomslaget desinfisert.
Ingen bøker vert lånte ut att før dei har vore igjennom denne prosessen.
No kan du søkje digitalt om sosialhjelp
Grunna Koronasituasjonen har ein fått framskynda løysninga med at ein kan søkje digitalt om sosialhjelp.
Informasjonsbrev
Rådmann og ordførar takkar tilsette og innbyggjarar i Modalen
Ei stor takk til tilsette og innbyggjarar i Modalen
Vi er alle prega og påverka av pandemien som no brer om seg i landet og regionen vår. Omfattande tiltak og grep vert gjort både nasjonalt og lokalt, noko som i stor grad styrer kvardagen til både tilsette og innbyggjarar på ein måte vi knapt har sett makan til tidlegare. Skular og barnehagar er stengt, idrettsanlegg er avlåst, kulturtilbod og fritidstilbod er avlyst, politiske møte vert utsett og helsetenestene våre er forventa sett under sterkt press i tida som kjem. Modalen kommune føl til ei kvar tid Folkehelseinstituttet og Helsedirektoratet sine tilrådingar, og sjølvsagt dei restriksjonar som sentrale styresmakter pålegg oss. Vi oppfordrar folk om å halde seg i ro og unngå unødige reiser, ikkje samle mange born og unge saman, la dei i staden ha ein eller to faste leikevener. I tillegg har vi vedteke lokale karantenereglar for studentar og elevar som kjem heim frå studier frå nokre stader i landet. Det er no meir smitte i dei store byane, og desse lokale restriksjonane er sett i verk for å bremse smittespreiing her hjå oss. Foreløpig har vi ikkje påvist smitte pr 17. mars i Modalen, men dette må vi vere førebudd på at kan endre seg raskt.
Som rådmann er eg særs stolt, men ikkje overrraska, over måten våre dyktige tilsette og leiarar har takla, og kjem til å takle vidare, denne utfordringa vi står i. Hendingane den siste veka har gjort meg endå tryggare på at våre tilsette og leiarar gjer alt som står i si makt for å løyse nye, vanskelege situasjonar og utfordringar som oppstår. Alt for å hindre og begrense smittespreiing i så stor råd som mogleg, samstundes som vi skal utføre lovpålagte og naudsynte tenester og oppgåver for innbyggjarane våre. Vi mobiliserer for å hindre smittespreiing og for å kunne gje naudsynt helsehjelp til dei som treng det.Tenestene våre organiserer seg på nye og sikrare måter, og det er mange gode døme på dette. Mange arbeider frå heimekontor. Reinhaldspersonalet vaskar og desinfiserer ein del lokale på ettermiddags- og kveldstid når andre tilsette ikkje er tilstades. Nye rutiner og planar vert utarbeidd for å sikre så god kontinuitet og sikker yrkesutøving som mogleg i helsetenestene våre. Lærarane planleggjer og tilretteleggjer for heimeundervisning. Barnehagen og skulen legg til rette for dei som har naudsynt rett til pass av born. Vaktmeistrane planlegg for å sikre vassforsyning. Tilsette på kommunehuset rullerer på kven som er tilstades og kven som arbeider heimeifrå for å kunne oppretthalde sentralbord, post og andre naudsynte oppgåver. Interne møter vert i størst mogleg grad gjennomført via telefon eller videomøte. Rammevilkår endrar seg kontinuerleg, men med dei haldningane, verdiane og positive ståpåviljen ein no ser i organisasjonen er eg trygg på at vi gjer vårt ytterste for vere rusta for tida vi no står i og tida som kjem. Tusen hjarteleg takk til alle tilsette for den innsatsen de til no har lagt ned, og for det arbeidet de gjer i fortsetjinga.
Samstundes vil eg rekkje ei stor takk til innbyggjarane våre for måten de har respondert på og takla situasjonen. Det er mitt soleklare inntrykk at innbyggjarane både aksepterer og respekterer tiltaka som no er innført, både nasjonalt og lokalt, sjølv om den nye kvardagen er krevjande. Vi opplever at folk no tek kontakt med Kundetorget og melder seg til teneste som frivillige til ulike oppdrag det vil vere behov for framover. Det set me stor pris på, og oppfordrar endå fleire til å gjere det same ved å sende epost med kontaktinformasjon til: postmottak@modalen.kommune.no.
Mange har spørsmål om kva som til ei kvar tid skjer og ynskjer meir informasjon. Vi vil freista å leggje ut ny relevant informasjon på nettsidene til kommunen og på kommunen si facebook side fortløpande. Vi oppfordrar og alle innbyggjarar til å halde seg oppdatert om den vidare utviklinga gjennom media og på nettsidene til Folkehelseinstituttet og Helsedirektoratet, då store nyhende og oppdateringar fil finnast der først.
Vi har og nytta SMS varsling av innbyggjarar, og det kan vere aktuelt å gjere det i nokre høve framover og. Kommunen bruker varslingssystemet Varsling 24 for å varsle innbyggjarar i kommunen om hendingar via sms, epost og talemelding. Er du usikker på om du ligg inne i registeret over dei som vert varsla, kan du snart finne meir utfyllande informasjon om korleis registrere seg på kommunen sine heimesider: modalen.kommune.no . Er du mellom dei som tidlegare allereie har motteke varsel, så er du registrert.
Ein del tilsette jobbar no til dels frå heimekontor og kan vere vanskeleg å nå på kontortelefon. Kontaktinformasjon til dei alle fleste av desse, både mobilnummer og epostadresser kan ein finna på kommunen si heimeside. Vi oppfordrar innbyggjarar til å framleis ta direkte kontakt med dei tenestene henvendinga angår. Har du til dømes spørsmål om skule eller barnehage, så tek ein kontakt med rektor eller styrar.
For mange innbyggjarar, bedrifter og arbeidstakarar er no kvardagslivet sett på vent, og mange er urolege. Vis at du er eit god medmenneske for andre som treng det i denne tida.
Med dei beste helsingar
Jo Tømmerbakke, rådmann
Til innbyggjarar og tilsette i Modalen
Me er no inne i ei tid som nesten ingen av oss som lever i dag har opplevd før. Skular og barnehagar stengjer og det vert innført restriksjonar for oss alle. Dette er ein situasjon som me ikkje er vande med for liva våre har til no vore levd, slik som kvar einskild ynskjer å leva det.
I tida som kjem vert det viktig å ta vare på kvarandre og halde seg til råda som vert gitt for å bremse spreiing av Koronasmitte. Slik eg opplever det, tek folk i Modalen dette på største alvor og det gjer meg glad og stolt over bygda vår. Det tyder på at me alle gjer ein innsats for å beskytte og ta vare på dei mest sårbare i kommunen vår og mange har sendt melding til postmottaket for å melde seg til frivillig innsats om det vert naudsynt. Sånt gjer meg som ordførar trygg på at dette skal me kome oss igjennom. Gløym heller ikkje dei som kanskje sit åleine i karantene eller isolasjon og føler på utryggleiken. Er det mogeleg kan du bruke Skype eller Facetime slik at ein får sjå eit ansikt. Om ikkje kan du ringje på gamlemåten for det er godt å berre høyre ei stemme og. Takk til alle innbyggjarar som gjer Modalen til ein trygg og god stad å vera i denne vanskelege tida. Som sagt tidlegare, De gjer meg glad og stolt over bygda vår.
Noko anna som tryggjer meg er innsatsen dei tilsette i Modalen kommune no viser. Frå leiargruppa og heilt ut i organsasjonen vert det i desse dagar lagt ned eit fantastisk arbeid, som er med å leggje grunnlaget for at samfunnet vårt skal kunne fungera framover. Helse og omsorg, vatn i springen, reinhald, utdanning sjølv om skulen er stengd, tilbod til born som har foreldre i samfunnskritisk stilling osb. Lista er lang over ting som me tek som sjølvsagt, i tillegg til nye behov som dukkar opp i denne tida. Takk til alle flinke tilsette i Modalen kommune for Dykkar innsats.
Me må heller ikkje gløyme dei tilsette i Modalen Kraftlag som kvar dag er ute og sikrar oss straum til m.a lys, varme og matlaging. Utan desse menneska ville heller ikkje kommunen greie å gje oss gode kommunale tenester i ei vanskeleg tid.
Så tusen takk alle saman og hugs å vask hendene ofte.
Kjetil Eikefet
Ordførar
